Surat Bang Jali Dalem Rangka 15 Taon Pernikahan Sama Mpok Romlah

Sengaja Abang bikin surat ini buat ngingetin cinta kita lima belas taon yang lalu waktu kita masih pacaran. Romlah mungkin masih inget waktu Abang ngirim surat pake kertas warna jingga. Terus besoknya Romlah kirim balesan lagi. Dalem surat itu, Abang masih inget Romlah bilang gini, “Aku juga cinta kamu, Bang”. Ooh, perasaan Abang waktu itu ngelayang jauh nembus langit ketujuh. Biar kata ntu surat udah luntur kecuci enyak tapi sama Abang tetep disimpen dalem dompet becampur sama kertas kasbon  koperasi. He he he.

Foto: kebudayaanindonesia.net

Romlah, sengaja abang kagak kirim SMS atawa telpon buat ngerayain 15 taon pernikahan kita. Abang cuma khawatir sekarang telpon juga lagi gawat. Abang takut kayak nasib orang-orang yang HP-nya disadap sama KPK. Pan kalo sampe disadap sama mereka berabe juga. (Tapi yang sebenarnya emang abang lagi kagak punya pulsa. Petugas koperasi juga romannya kagak napsu kalo Abang kasbon lagi biar kata abang suap pake sepiring ketoprak. Yah maklum udah kebanyakan kasbon.

Kagak terasa selama 15 taon ini, kita udah punya dua bocah. Si Toing sama Jamilah. Abang maklum banget dah kalo Romlah cape. Cape siang ari ngurusin bocah, cape malemnya nemenin Abang. Tapi seperti Pak ustad bilang, cape ngurus rumah tangga itu ibadah. Alhamdulillah..

Romlah, Abang minta  maap kalo selama 15 taon ini belom bisa bahagiain keluarga. Abang blom bisa jadi laki idaman. Abang belom bisa kayak Rasulullah yang begitu sempurna di mata isteri sama anak-anaknya. Tapi, yakinlah Romlah. Biar kata Abang masih begini, Abang juga punya cita-cita pengen seperti baginda Rosul, bahagiain anak bini dunia akhirat.

Oh ya, biar hidup kita masih begini, Alhamdulillah Abang bahagia. Bener kata Pak Ustad, kebahagiaan itu bukan pada harta benda, tapi dalem hati. Kalo dulu kita tinggal di kontrakan, sekarang udah punya gubuk sendiri biar kata saban musim ujan kebanjiran. Kalo dulu tiap ari Abang jadi kuli pabrik, Alhamdulillah sekarang ada kemajuan, kerja sambil ngurusin blog. Hihihi

Btw, gimanapun juga kecilnya kemajuan yang kita rasakan, Abang tetep ngerasa keadaan ini juga buah dari kesabaran dan keiklasan keluarga. Ibarat kata, kesengsaraan di masa lalu yang pernah kita rasakan jadi cambuk buat kita idup lebih baek lagi di masa depan. Kalo pinjem istilah Aa Gym-nya mah, betul tidaak?
Biar Romlah tau, waktu Abang nulis surat ini, di langit bentang-bentang berkedip. Semuanya menyaksikan ketulusan Abang ngungkapin semua kata-kata yang keluar dari hati sanurpai ini. I Luv U. Emmuach.

Abang,
Suami Idaman

Rojali bin Muhsin